नेपालगंज । सिङ्गो जीवन कुनै संयोग होइन, त्यो उद्देश्य, संघर्ष र समर्पणको सिलसिला हो। वरिष्ठ पत्रकार डा. डक्ट धितालको जीवनयात्रा पनि यस्तै अद्वितीय मिसाल हो—जहाँ शिक्षाको उज्यालो, सेवाको समर्पण र पत्रकारिताको चेतनाले गाउँदेखि अन्तर्राष्ट्रिय मञ्चसम्म मार्ग तय गरेको छ।
जुम्लाको गल्लीबाट सुरुवात
जुम्ला जिल्लाको सिँजा गाउँपालिका–३ स्थित धिताल लिँहि गाउँ। यहि भूगोलमा बालक डक्ट धितालले आँखा खोल्नु भयो । विकटता र अभावको वातावरणमा हुर्किँदै पनि उहाँको सपनाले सधैं फराकिलो आकास हेर्न खोज्यो—जहाँ आम मानिसका कथा, व्यथा र सम्भावनाहरू समेटिन सकून्।
शैक्षिक श्रम र सफलता
बुझाइ गहिरो, लेखाइ धारिलो र सोच विश्लेषणात्मक—यी विशेषताले नै डा. धिताललाई शिक्षामा अग्रसर बनायो । एलएलबी गर्नुका साथै नेपाली, पत्रकारिता, समाजशास्त्र र राजनीतिशास्त्र विषयमा स्नातकोत्तर गर्नुभयो। पत्रकारितामा विद्यावारिधी (PhD) गरी ज्ञानको चुचुरो चुम्नुभयो। यो शैक्षिक संलग्नता उहाँको बौद्धिक व्यक्तित्वको गहिराइ दर्शाउँछ।
पत्रकारितामा खोज र आवाज
२०५७ सालदेखि खोजमूलक पत्रकारितामा होमिएका डा. धितालले जनताको पक्षमा कलम चलाउँदै आउनु भएको छ । हाल रेडियो मर्निङ स्टार ९० मेगाहर्जका स्टेशन म्यानेजर र गुडन्यूज खबर डटकम तथा गुडन्यूज साप्ताहिकका सम्पादक भएर आफूलाई समर्पित धिताल पत्रकारिता जगतका उदाहरण हुनुहुन्छ भन्दै आफ्ना गुरु भएको पत्रकार प्रदिप गुप्ताले बताउनु भयो । उहाँको पत्रकारिता प्रश्न सोध्ने मात्र होइन, उत्तर खोज्ने यात्रासमेत हो।
अन्तर्राष्ट्रिय पहिचान र अनुभव
उहाँको चेतना अब सिमा भित्र सीमित छैन। डा. धितालले भारत, चीन, दुबई, कोरिया, थाइल्यान्ड लगायत देशहरूमा भ्रमण र प्रशिक्षण मार्फत नेपाली पत्रकारिता र सामाजिक सेवामा आफ्नो अन्तर्राष्ट्रिय छवि बनाउनु भएको छ डा. धितालले । यिनै अनुभवहरूले उहाँलाई वैश्विक दृष्टिकोण भएका पत्रकार र समाजसेवी बनाएका छन्।
दृष्टिविहीनको आशा
२०६४ सालदेखि जुम्लाको भैरव माध्यमिक विद्यालयमा दृष्टिविहीन विद्यार्थीहरूको सेवा गर्दै आउनु भएका डा. धिताललाई “दृष्टिविहीनको उज्यालो” भन्नु अनुचित हुँदैन। उहाँको समर्पणले प्रेरित भएर दर्जनौं दृष्टिविहीन विद्यार्थीहरूले स्नातकोत्तरसम्मको अध्ययन पूरा गरेका छन्, धेरैजना शिक्षक समेत बनेका छन्।
कलमबाट समाज
उहाँको ‘नयाँ जीवन’ नामक कथासंग्रह प्रकाशित भइसकेको छ भने कविता संग्रह र उपन्यास प्रकाशनको तयारीमा हुनुहुन्छ। उहाँका शब्दहरू केवल साहित्य होइनन्, समाजको वास्तविकता, वेदना र प्रतिबद्धताको प्रतिबिम्बका रुपमा डा. धिताल हुनुहुन्छ ।
नेतृत्व र पत्रकार संगठन
प्रेस सेन्टर नेपाल बाँकेका दुई कार्यकाल अध्यक्ष, प्रेस संगठन नेपाल बाँके संयोजक, प्रेस सेन्टरको केन्द्रीय सदस्य तथा बाँके इन्चार्जको रूपमा उहाँले संगठनात्मक नेतृत्वमा पनि योगदान दिनुभएको छ । उहाँ नेतृत्वको नाममा केवल हैसियत होइन, जिम्मेवारी बोक्ने पात्र हुनुहुन्छ।
स्वास्थ्य र सेवामा अग्रणी
डा. धिताल नेपालगन्जको भेरी अस्पताल विकास समिति सदस्यको रूपमा स्वास्थ्य क्षेत्रमा पनि सक्रिय रहँदै आउनु भएको छ। जनसेवा, पहुँच र समानताको पक्षमा काम गर्दै उहाँले चिकित्सा क्षेत्रमा पनि नागरिक सरोकार जोड्नुभएको छ । हजारौं सर्वसाधारणहरुको सेवा गर्दै आउनु भएका डा. धितालले हजारौं सर्वसाधारणको सेवा गर्दै आउनु भएको छ भन्दै समाजसेवी गयालाल धितालले बताउनु भयो ।
मानवता र साथ
उहाँलाई चिनेका प्रत्येक व्यक्ति भन्छन्—“डा. धिताल दुखी, गरिब र अपहेलित वर्गको न्यायका सारथी हुनुहुन्छ।” उहाँ आफैंमा एक संस्थाजस्तो व्यक्तित्व, जसले जहाँ पुगे पनि परिवर्तन, चेतना र सेवाको बीउ रोप्छ।
डा. डक्ट धितालको जीवन एउटा साधारण गाउँबाट सुरु भएको असाधारण यात्रा हो। शब्द, सोच र समर्पणको त्रिवेणी हो उहाँ। पत्रकारिता, शिक्षा, साहित्य, सेवा र नेतृत्व—सबै क्षेत्रमा उहाँले छाडेको प्रभाव सदाको लागि अनुकरणीय रहिरहनेछ भन्दै अस्पताल आउने जो कोहीले प्रशंसा गर्ने गरेको पाइन्छ । उहाँ जस्ता व्यक्तिहरू समाजका लागि
प्रकाश मात्र हैनन् उहाँ जो गाउँको गल्लीदेखि अन्तर्राष्ट्रिय मञ्चसम्म फैलिइरहेको एक उज्यालो प्रकाश हो
दिपेन्द्र धिताल । २२ जेष्ठ २०८२, बिहीबार २२:३५