नेपालगन्ज । बाँकेमा ‘जेनजी’ आन्दोलनका क्रममा सञ्चारकर्मी र उनीहरूका सञ्चार सामग्री तथा सवारी साधनमाथि आक्रमण, दुव्र्यवहार, आगजनी र तोडफोड भएको घटनाप्रति नेपाल पत्रकार महासंघ बाँके शाखाले घोर भत्सना गरेको छ।
महासंघ बाँके शाखाले आइतबार विज्ञप्ति जारी गर्दै घटनाको सत्यतथ्य छानबिन गरी दोषीमाथि कारबाही गर्न र क्षतिग्रस्त सञ्चार सामग्री तथा सवारी साधनको उचित क्षतिपूर्ति दिलाउन माग गरेको छ। साथै, घाइते सञ्चारकर्मीहरूको शीघ्र स्वास्थ्य लाभको व्यक्त गरिएको छ ।
सम्वेगन्यूज डटकमका पत्रकार निरज सिंह आन्दोलनकारीको आक्रमणमा परि क्यामेरा जलाइदिएको र उनी कोहलपुर नगरपालिका कार्यालयमा आश्रय लिन पुगे पनि त्यहाँ आगजनी भएपछि भवनबाट हाम फालेर ज्यान जोगाउनुपरेको महासंघले जनाएको छ । कृष्णसार एफएमका सञ्चारकर्मी शम्भुप्रसाद थारूको मोटरसाइकल खजुरा बजारमा तोडफोड भएको छ। मोटरसाइकलको अगाडिको भागमा क्षति पुगेको बताइएको छ। पत्रकार गिरिश गुप्ता भिडियो खिच्ने क्रममा आन्दोलनकारीको आक्रमणबाट टाउकोमा घाइते भएका छन्।
महासंघ बाँके शाखाले यस्ता घटनाले प्रेस स्वतन्त्रतामाथि ठाडो आघात पुगेको भन्दै स्वतन्त्र र सुरक्षित वातावरणमा सञ्चारकर्मीहरूले आफ्नो पेशा निर्वाह गर्न सक्ने अवस्था सुनिश्चित गर्न सरकारको गम्भीर ध्यानाकर्षण गराएको छ।
बिहानीको तारा । २९ भाद्र २०८२, आईतवार १९:४४