बाँके । नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले संघीय लोकतान्त्रिक गणतन्त्र माओवादी सपना भएको आज बाँकेको राप्तिसोनारी ६ फत्तेपुरमा भएको हुलाकी राजमार्ग अभियानको क्रममा प्रचण्डले बताए । एकथरी मानिस प्राप्त उपलब्धिहरू उल्ट्याउने प्रयासमा लागिरहेको उनले बताए ।
‘प्राप्त उपलब्धि उल्ट्याउन खोज्नेहरूले राजा चाहियो भन्न खोज्छन् । हामी यो अभियानमै भएका बेलामा काठमाडौँमा एकखालको स्याल हुइयाँ चल्यो । लौ नारायणहिटी पसाउने रे ज्ञानेन्द्रलाई भनेजस्तो’ हुइया चल्यो उनले भने, ‘त्यो सम्भव त थिएन तर पनि मान्छेलाई भ्रम दिने कोसिस गरियो ।’
त्यस्तो भ्रम फैलाएपछि आफूहरूले अभियान नै रोकेर चैत १५ गते १ लाख जनता विशाल प्रदर्शन गरेको र दुनियाँले प्रशंसा गरेको प्रचण्डले बताए ।
‘त्यही दिन राजावादीहरूले तीनकुनेमा राखेको कार्यक्रममा हत्या हिंसा र लुटपाट भयो’, प्रचण्डले भने, ‘माओवादीले एकचोटी हानेपछि राजावादी बेलुनको हावा खुस्कियो ।’ उनले त्यस्तो दुस्साहस नगर्न पनि राजावादीलाई चेतावनी दिए ।
यसैगरी प्रचण्डले प्रधानमन्त्री केपी शर्मा ओलीले शिक्षकका समस्या सम्बोधन गर्नतर्फ नलागेर अपमान गरिरहेको आरोप पनि लगाए । प्रचण्डले शिक्षकका सवालमा सरकारले जिम्मेवारीपूर्वक काम नगरेको बरु अपमान गर्नतिर लागेको बताएका हुन् ।
‘अहिले शिक्षकहरू हडताल र आन्दोलनमा हुनुहुन्छ । शिक्षा क्षेत्रमा नयाँ नीति बनाउन म प्रधानमन्त्री भएका बेलामा शिक्षा विधेयक समितिमा पुगेको थियो’, प्रचण्डले भने, ‘तर यो सरकारले जिम्मेवारीपूर्वक काम गरेको छैन, शिक्षकहरूलाई अपमानित गरेको छ ।’
उनले शिक्षकहरूका सवालमा सर्वोच्च अदालतले समेत ३ दिनभित्र माग पूरा गरेर उनीहरूलाई विद्यालय फर्काउने वातावरण बनाउन आदेश दिएको बताए । उनले आफूलेसमेत समस्या समाधानमा मन्त्री र शिक्षकहरूसँग छलफल गरिरहेको भन्दै बरु प्रधानमन्त्रीको रवैया समस्या समाधान गर्नेतिर नभएको बताए ।
सन्तोष कुमार बिष्ट । १४ बैशाख २०८२, आईतवार १७:३७