१३ चैत्र २०७८ नेपालगंज । आसन्न बैशाख ३० गते हुने स्थानीय तह निर्वाचनका लागि एक करोड ७७ लाख ३३ हजार ७२३ मतदाता कायम भएका छन् । निर्वाचन आयोगका सहप्रवक्ता सूर्यप्रसाद अर्यालका अनुसार कुल मतदातामध्ये ८९ लाख ९२ हजार दशजना पुरुष र ८७ लाख ४१ हजार पाँच सय ३० जना महिला रहेका छन् । अर्यालका अनुसार यौनिक अल्पसंख्यक मतदाताको संख्या १८३ छ ।
आयोगले मतदानस्थल तथा मतदान केन्द्रको अन्तिम संख्या पनि टुंग्याएको छ । स्थानीय तह निर्वाचनका लागि १० हजार सात सय ५६ मतदानस्थल र २१ हजार नौ सय ५५ मतदान केन्द्र कायम गरिएको अर्यालले नयाँ पत्रिकालाई जानकारी दिए । आयोगले नेपालको निर्वाचन इतिहासमा पहिलोपटक निर्वाचनको अघिल्लो दिनलाई ‘कट अफ डेट’ मानेर मतदाता नामावली टुंग्याएको हो ।
यसअघि सरकारले निर्वाचनको मिति घोषणा गरेको मितिसम्ममा १८ वर्ष उमेर पुगेकाहरूको नाम मतदाता नामावलीमा समावेश गर्ने प्रचलन थियो । तर, यसपालि आयोगले निर्वाचन हुनुभन्दा अघिल्लो दिन अर्थात् २९ वैशाखसम्म १८ वर्ष पुग्ने नागरिकको नाम मतदाता नामावलीमा समावेश गरेको छ ।
आयोगले यसपालि मतदाताको संख्या एक करोड ७९ लाख पुग्ने अनुमान गरेको थियो । ०७४ को निर्वाचनमा मतदाताको संख्या एक करोड ५४ लाख २७ हजार नौ सय ३८ रहेको थियो ।
बिहानीको तारा । १३ चैत्र २०७८, आईतवार २०:०६